Ақтөбеде автотұрақтағы көліктердің қосалқы бөлшектері тексерілді
АҚТӨБЕ. ҚазАқпарат - Ақтөбеде көлікті ұрлап, бөлекшектерін сатып жіберетіндердің алдын алу мақсатында арнайы рейд ұйымдастырылды, деп хабарлайды ҚазАқпарат тілшісі.
Ақтөбе қаласының аумағында «Көлікті айдап әкету» жедел алдын алу шарасы жүргізілді.
Шараның мақсаты – техникалық қызмет көрсету станцияларының жұмысындағы заңдылықты тексеру, қала аумағында орналасқан автобөлшек сату орындарын бақылау.
Рейд автотұрақта ұрланған көліктің бар-жоғын, ұрланған автокөліктер мен қосалқы бөлшектерді сатып алумен және өткізумен айналысатын адамдарды анықтауға бағытталды.
«Өткен жылы 13 автокөлік ұрланды. Сондай-ақ 18 автокөліктің бөлшегін ұрлау дерегі анықталды. Ақтөбе қаласының полиция қызметкерлері автокөлік ұрлығы қылмысының алдын алу, жолын кесу және анықтау бойынша ауқымды шараны жалғастырады», - деді облыстық ПД баспасөз қызметінің жетекшісі Ерболат Сарқұлов.
