Ақтөбеде білім басқармасының басшысы тағайындалды
Ақтөбеде кадрлық ауыс-түйіс болды. Ақтөбе облыстық білім басқармасына бүгін Ләззат Оразбаева тағайындалды. Жоғары білімді, бірнеше дипломы бар маман алғашқы еңбек жолын мұғалім болып бастады. Ол Қ.Жұбанов атындағы Ақтөбе университетінің жалпы техникалық пәндер және физика мамандығы, Қ.Жұбанов атындағы Ақтөбе өңірлік мемлекеттік университетінің құқықтану мамандығы бойынша білім алды. Кейін «Тұран-Астана» университетінің педагогика және психология магистрі атанды. Еңбек жолын Шалқар ауданы, Тоғыз орта мектебінде мұғалім болып бастады. Кейін Ақтөбе қаласында №24 орта мектебінің мұғалімі, №40 орта мектебінің директоры қызметтерін атқарды. Ұзақ жыл бойы Ақтөбе қалалық білім бөлімін басқарып, жаңа қызметке тағайындалғанға дейін Ақтөбе қаласы әкімінің орынбасары болып жұмыс істеді.
