Ақтөбеде «Ер Едіге» қойылымының премьерасы болды

АҚТӨБЕ. ҚазАқпарат - Ақтөбе облыстық драма театрында жазушы Светқали Нұржанның сценарийі бойынша Данияр Базарқұлов қойған «Ер Едіге» спектаклінің премьерасы өтті, деп хабарлайды ҚазАқпарат тілшісі облыс әкімінің баспасөз қызметіне сілтеме жасап.

Этно-фольклорлық тарихи драма Едіге батырдың ерлігі мен қазақ тарихының жарқын кезеңдері жайында баяндайды. Айта кетейік, бұл Едіге батырдың атын шығарған алғашқы спектакль. Оның қойылымы Алтын орданың 750 жылдығына арналған.

«Оқиға Тоқтамыстың хан ордасында өрбиді. Тоқтамыс ханның әйелі Тоғайбек ханым
даланың екі арысыТоқтамыс хан мен Едіге батырдың арасына жік салып, олар дұшпанға айналады. Спектакльде сондай-ақ, Алтын Орданың соңғы, мызғымас әміршісі Әмір Темір мен Едіге батырдың қарым-қатынасы да айтылады»,- дейді режиссер Данияр Базарқұлов.
Қойылымдағы тарихи оқиғалар Едігенің ерлігін жырлаған замандас ақындардың жырымен астасып жатыр . Көптен күткен тұсаукесерде облыс әкімі Оңдасын Оразалин, сонымен қатар, спектакль авторы Светқали Нұржан, құрметті қонақтар, соның ішінде еліміздің өзге өңірлерінен келгендер болды.

Облыс әкімі Оңдасын Оразалин тұсаукесерден кейін: «Бүгін біз айтулы оқиғаның куәсі болдық. Қойылымның оқиға желісі біздің тарихи жадымызды оятады. Едігенің тарихтағы орны мен маңызы әлі күнге дейін толық зерттелмеген. Соңғы жылдары Ақтөбе облысында ұлы батырдың есімін жаңғырту және сақтау бағытында ауқымды жұмыстар атқарылды, яғни халықаралық ғылыми-тәжірибелік конференциялар өткізіліп, ескерткіш орнатылды, «Ер Едіге - Ноғайлы дәуірінің жыры« атты альбом жинағы таныстырылды. Өңірде халықтың бай мәдени мұрасын жүйелендіру және өзектілендіру бойынша ауқымды жұмыстар жалғасатын болады»,- деп атап өтті.

Фото: instagram @dramteatr_aktobe