Ақтөбеде ерлі-зайыпты коммуналдық мекеме қызметкеріміз деп үй тонаған
АҚТӨБЕ. ҚазАқпарат - Ақтөбеде ерлі-зайыпты үйлерді аралап, бағалы заттарды ұрлаған. Полиция ұрлық жасағандарды көшеден ұстап алды, деп хабарлайды ҚазАқпарат тілшісі.
Ақтөбе облыстық полиция қызметкерлері жұмыс уақытында үйлерді аралап, есік қағып, ешкім жауап бермесе үйді тонап жүрген ерлі-зайыптыны ұстады.
«Ерлі-зайыпты үйде ешкім болмайтын уақытты пайдаланып, бағалы заттарды ұрлап кетіп жұрген. Олар терезедегі торды майыстырып, оңай кірген. Кейін алтын бұйымдар мен ақша, ыдыс-аяқты алып кетті. Күдіктілер арнайы киім киіп алған. Өздерін коммуналдық сала қызметкерімін деп таныстырған», - деп хабарлады облыстық полиция департаментінің баспасөз қызметі.
Қазіргі уақытта ерлі-зайыптылардың басқа да қылмыстық іске қатысы бар-жоғы тексеріліп жатыр. Олар тергеу аяқталғанша қамауда отыруы мүмкін.
