Ақтөбеде І топ мүгедегі ЖОО оқу грантына ие болды
Бүгін Ақтөбе қаласында Халықаралық балаларды қорғау күніне арналған мерекелік бағдарламалар ұйымдастырылды. Балалар спорттық ойындарға қатысып, концерттік бағдарламаларды тамашалады. Ал бұл күн таяуда мектеп бітірген Инжифия Каликова үшін ерекше күн болды. Ол Құдайберген Жұбанов атындағы Ақтөбе мемлекеттік өңірлік университетінде тегін оқуға мүмкіндік алды.
«Қ.Жұбанов университетінің шетел тілдері факультетіне оқуға түстім. Өзім қалап, армандап, сол арманға қол жетіп отыр. Ағылшын тілін таңдадым», - деді Инжифия Каликова.
І топ мүгедегі Инжифия Каликоваға №23 орта мектептің мұғалімдері сабақ берген. Ал өз арманы туралы ҚР Мемлекеттік қызмет істері және сыбайлас жемқорлыққа қарсы күрес іс-қимыл агенттігінің облыстық департаменті ұйымдастырған кездесу кезінде айтқан. Аудармашы болуды армандаған түлек «Құдайберген Жұбанов атындағы грантын» иеленді.
Сондай-ақ, «Бақытты балалық шақ» фестиваль-конкурсына қатысқан Ахмет Ақниет алдағы күндері Ахмет Жұбанов атындағы музыкалық колледжде тегін білім алады. Ойыл ауданы Жания Жүсібалиев атындағы қазақ орта мектебінің түлегі «Қазақстан балалары шексіз әлемде» бейнероликтер байқауына қатысып, жеңімпаз атанған. Сонымен қатар, республикалық Абай, Шәкәрім оқуларында жеңімпаз болды. Ол да колледжде тегін оқуға мүмкіндік беретін грантты иеленді.