Ақтөбеде инертті материал өндірген серіктестік 100-ден астам жұмысшыға қарыз
АҚТӨБЕ. KAZINFORM – Ақтөбе облысы бойынша жұмысшылар алдындағы қарызы көп «Mining Inert Materials» ЖШС банкрот деп танылып, бүгінді іс сотта қаралып жатыр. Компанияның жұмысшылар алдындағы қарызы 30 млн теңгеден асады.
Ақтөбе облыстық еңбек инспекциясы басқармасының басшысы Жандос Әлімов өңірлік коммуникациялар қызметінде өткен жылды қорытындылап, алдағы жоспарымен бөлісті. Былтыр облыс бойынша 400-ден астам тексеру жүргізілген. Нәтижесінде 130 жұмыс берушіге 24 млн теңгеден астам айыппұл салынды.
- Шетелдік жұмыс күшін тарту бойынша тексеру де жүргізілді. Бұл салада 40-тан астам заңбұзушылық анықталды. Барлығы 6 әкімшілік жаза қолданылып, 2,7 млн теңге айыппұл салынды. Айта кетерлігі, облыста шешімін таппай тұрған еңбек дауы жоқ. Былтыр «СНПС-Ақтөбемұнайгаз» АҚ-ның «Батыс мұнай» мекемесінде жалақы дауын көтерді. Бұл реттелген жұмыс,- деді Ақтөбе облыстық еңбек инспекциясы басқармасының басшысы Жандос Әлімов.
Айта кетейік, былтыр 80 адам өндірістік жарақат алды. Онда 13 адам көз жұмды. Көбі тау-кен, мұнай-газ саласында тіркелді. Өндірістік оқиғаларға қатысты арнайы тексеру жүргізіліп, 73 тұлғаға қатысты іс полицияға тапсырылды.
- Былтыр 8 мекеме өз жұмысшыларына 72,8 млн теңге қарыз болды. Қазір кезде тек бір іс қалды. Ол - «Mining Inert Materials» ЖШС-і. Бұл компания 138 жұмысшысына 31,6 млн теңге қарыз. Қазір банкроттық деп тану жұмысы жүріп жатыр. Заң бойынша мүлкі сатылып, бірінші жұмысшылардың қарызы өтеледі,- Жандос Әлімов.
