Ақтөбеде қаңғыбас иттерге арналған көрме өтіп жатыр
Ақтөбедегі өнер музейінде ерекше көрме ашылды. «Ақтөбедегі иттер: қаңғыбастардың тіршілігі» атты көрмеге барлығы 45 сурет қойылған. Әрі қайырымдылық жәшігі бар. Еріктілер осы арқылы иесіз иттерге қамқорлық көрсетіп, оларды тамақтандырмақ. Тіпті арнайы үйшік, қарғы бау алуға дайын.
Әр суреттегі иттің өз тарихы бар. Мәселен, Мотюді еріктілер мейрамхана жанынан тауып алған. Аяғы жараланған итті емдеп, жазып алды. Ал Чинаны ақтөбеліктер алып, кейін екі рет еріктілерге қайтарып берген. Ақтөбеліктердің көбі уақыт аз, итке қарау мүмкін емес болған соң төрт аяқты жануарды далаға қалдырады немесе еріктілерге тапсырады.
Айта кетейік, еріктілер иттерді арнайы суретке түсірді. Жаңа жылдық суретті Мария Коннова түсіріп, Юлия Усупбаева әрледі. Иттерді шырша жанына қойып, сәндеген еріктілер оларды жақсы адамдардың қолына тапсырғысы келеді. Сондықтан арнайы түсірілген суретке «Үйімді іздеймін» деген жазба ілінді. Бұл көрме бір айға созылады. 
