Ақтөбеде қар күреу, су сорғызу жұмысы қарқынды жүріп жатыр

АҚТӨБЕ. ҚазАқпарат – Ақтөбе облысы аумағынан 550 мың текше метр қар шығарылып, 71 мың текше метр су сорғызылды. Өңірде су басу қаупі бар 30 елді мекенде бақылау күшейтілді, деп хабарлайды ҚазАқпарат тілшісі.

Ақтөбе облысында қар баяу еріп жатыр. Облыстық төтенше жағдайлар департаментінің басқарма бастығы Құмар Тұрмағамбетов өңірлік коммуникациялар қызметінде өткен брифингіде су тасқынына қарсы жұмыс пен елді мекендердегі жағдайды айтты.

«Аудан орталықтарында су тасқынына қарсы штаб құрылды. Ақтөбе қаласында да штаб бар. Тұрғындар хабарласып, комиссиядан көмек сұрай алады. Сонымен бірге облыста 1500-ден астам адам, 400-ден астам техника дайын тұр. Ақтөбе қаласында 100-ден астам көлік иесімен келісімшарт жасалып, олар жұмысын бастады. Жол астындағы су өткізу құбырының 60% және көпірдің 90 % тазартылды. Бірер күнде жұмыс аяқталады», - деді Құмар Тұрмағамбетов.

Облыста 30 елді мекен қауіпті аймақта тұр. Онда 11 мыңнан астам адам тұрады.

«Қауіпті аймақ болғанымен, бәрі суға кетеді деп айтуға болмайды. Тасқын судың салдарын жою үшін 218 млн теңгеден астам қаражат қарастырылған. Қаржыға 230 тонна жанар-жағармай, 9 730 тонна инертті материал, 13 мыңнан астам адамды уақытша орналастыратын 76 пункт, 467 бірлік техника, 73 жүзу құралы, 229 мотопомпа дайындалды», - деді Құмар Тұрмағамбетов.