Ақтөбеде қар суы ауыл тұрғындарын әбігерге салды
АҚТӨБЕ. KAZINFORM – Шалқар ауданы Бозой ауылында күн күрт жылып, көшелерге су жиналды. Су сору жұмыстарына 16 техника жұмылдырылды.
Бозой ауылындағы қар суын сору жұмыстарына 16 техника мен 24 адам жұмылдырылды. Сонымен бірге техника көмегімен су жиналған жер жырылды.
- Қар еріп, су сору жұмысы шұғыл жүргізілді. Қазір әлеуметтік нысандар мен үйлерге еш қауіп төніп тұрған жоқ. Тек ресми дерекке сену керек. Егер қосымша сұрақ болса адамдар жергілікті әкімдікке хабарласа алады,- деді ауыл әкімінің міндетін атқарушы Бағдагүл Аязбаева.
Айта кетейік, Бозай ауылында 7 наурыздан 8 наурызға қараған түні жауын-шашын болған. Кейін қар күрт еріген. Ақтөбе облыстық ТЖД баспасөз қызметінің хабарлауынша, қызметкерлер Ақтөбе қаласындағы 11 бау-бақша ұжымына барды. Онда 235 үйге су тасқыны мен одан қорғану туралы жандынама таратты. 20982 әскери бөлімінің қызметкерлері Жаңақоныс тұрғын алабындағы арналарды тазартты.
- Облыста ТЖД және жергілікті атқарушы органдардың күшімен су басқан аумақтардағы қарды шығару, су арналарын тазарту, жағалауларды нығайту, бөгеттерді салу және суды ағызу жұмыстары жүргізіліп жатыр. Нәтижесінде облыс аумағынан 58 100 текше метр қар шығарылды. Ақтөбе облысының өзен арналарында аумағы 300 шаршы болатын қамыс шабылды. Сонымен бірге 1730 текше су сору жұмыстары жүрді. 11 наурызда Ойыл ауданының Берсиев, Сарқырауық, Ақмешіт, Ойыл, Ашықбай ауылдарындағы 3600 шаршы метр аумақта жарылыс жұмыстары жүргізілді, - деп хабарлады Ақтөбе облыстық ТЖД баспасөз қызметі.
Синоптиктердің хабарлауынша, ертең облыстың солтүстігінде, шығысында тұман түседі. Ауа температурасы түнде 0-5, облыстың шығысында -8 градус, күндіз -2 градус суық , облыстың оңтүстігінде +6 градус жылы болады. Ал 13 наурыз күндіз облыстың батысында, солтүстігінде жаңбыр жауады. 14 наурызда түнде облыстың солтүстігінде, шығысында жаңбыр, қар жауып, арты көктайғаққа ұласуы мүмкін. Облыстың батысында, оңтүстігінде, орталығында тұман түседі. Ауа температурасы түнде -3 градус суық, ал облыстың оңтүстігінде +10+13 градус жылы болады.
Еске салсақ, Ақтөбе қаласы мен 8 ауданда мұз жару жұмыстары жүріп жатыр.
