Ақтөбеде Көрісу күні 100 әже мен 100 келін керуен құрды
АҚТӨБЕ. KAZINFORM – Қаладағы «Геолог» мәдениет үйі 100 әже мен 100 келін керуенін ұйымдастырып, Көрісу күнін атап өтті.
Ақтөбе қаласы Есет батыр тұрғын алабында бүгін ене мен келін керуені өтті. Оған кимешек киген әжелер мен орамал тартқан келіндер қатысты.
- Былтыр кимешек киген 100 әже керуені өтті. Биыл 100 енеге 100 келін қосылды. Келер жылы тағы 100 немере ертіп, керуенге шығады деп жоспарлап отырмыз. Наурызнама тұжырымдамасының бірінші күні, яғни, Көрісу күні осылайша қайта жаңғырып жатыр. «Геолог» мәдениет үйінің «Шолпы» клубы ұйымдастырған шара халықтық сипат алып келеді. Ұлттық киімді бір күн емес, күнделікті жұмысқа киіп жүруге болады. Әжелеріміздің арасында 90 жастан асқандары мен 65 жастағы қариялар бар. Ал келіндердің арасында жасы да, босағаны 10 жыл бұрын аттағаны да бар,- деді «Дәстүрге жол» аналар кеңесінің мүшесі Бибігүл Әбдішүкірқызы.
Қолына қыран қордырған батырлар мен тазы ерткен ер азаматтар да керуенде болды. Бұл шараға мәдениет үйі екі апта бұрын дайындалған.
- Ақтөбе қаласы Алматы ауданы Есет батыр тұрғын алабында мектеп, балабақша, түрлі мекемелер бар. Олардың бәріне екі апта бұрын хабар беріп, керуенге атсалысуды сұрадық. Сонымен бірге «Геолог» мәдениет үйінің әжелер ансамблі қосылды. 100 әже мен 100 келін керуені жүріп өткен соң тұрғындар концерт тамашалады. Ауылдың әдемі көрінісі осы,- деді «Геолог» мәдениет үйінің директоры Арман Жиеналиев.
Ақтөбелік өлкетанушы Бекарыстан Мырзабаев бұл күннің танымдық рөлі басым болу керек деп санайды.
- Қазір танымымызды кеңейту керек деп айтамыз. 10 күн бойы тойлай бермей, астрономиялық негізі бар екенін де айту керек. Омар Хаям жылдың ұзақтығын 264 күн 5 сағат 17 минут 46 секунд деп білгілейді. Әл-Бирунимен екеуі осындай нақты дәлдікпен есептеген. Ақпан 28 күннен аяқталады, төрт жылда бір рет Кібісе жылы келеді. Бір күн қайдан пайда болды? Ол бір жылда жиналған 5 сағат 17 минут 46 секундтан пайда болды. Төрт жылда 21 сағат 12 минут болады. Бұл 24 сағатқа жетпеді. Жиналып-жиналып, 13 күн айырмашылық шықты. 14-нен бастап Наурыз келді деп көрісетін себебіміз сол. Көрісу күн мен түн теңелген кезде болу керек деп есептеймін. Менің естігенім бойынша ер адаммен ер адам, әйелмен әйел құшақтасып көріседі. Ал ер мен әйел қол алысып көріседі. Тек Наурызда, Амал күнінде емес, көптен көріспегендер солай көріседі. Осындай дәстүрімізді жаңғыртқан дұрыс деп ойлаймын. Көріскен, бір-бірін аралағын дұрыс. Ақтөбенің Байғанин, Ойыл, Темір, Қобда аудандарында сақталған,- деді өлкетанушы.
Бүгін Ақтөбенің барлық аудан, ауылында Көрісу күні өтіп жатыр. Ал кешке «Көктем басы – Көрісу күні» атты мәдени-көпшілік шарасы өтеді.
Айта кетейік, Маңғыстаудағы Отпан тауда «Бірлік оты» жағылды.
