Ақтөбеде полиция қызметкері табельдік қарудан оқ атып, танысын жаралады

АҚТӨБЕ. KAZINFORM — Жараланған танысы дін аман, ауруханада ем қабылдап жатыр.

Ақтөбе облыстық ПД баспасөз қызметінің хабарлауынша, полиция қызметкері қауіпсіздік ережесін сақтамаған. Салдарынан табельдік қарудан абайсызда бір рет атып, танысын жаралап алды. Жараланған ер адам дереу ауруханаға жеткізілді.

— Қылмыстық кодекстің «Салғырттық» бабы бойынша іс қозғалды. Оқиғаның мән-жайы анықталып жатыр. Полиция қызметкері қызметінен шеттетілді. Тергеу полиция департаменті бастығының бақылауында, — деп хабарлады Ақтөбе облыстық ПД баспасөз қызметі.

Ал облыстық денсаулық сақтау басқармасының баспасөз қызметі, науқастың жағдайы тұрақты деп отыр. Ол ауруханада ем алып жатыр. Ота жасалмады, тек алғашқы хирургиялық көмек көрсетілді.

Еске салсақ, Ақтөбеде әйел екі баласын өлтірді деген күдікке ілікті. Атыраулық тұрғын Мұғалжар ауданы Қандыағаш қаласына қонаққа келген.