Ақтөбеде тұрғындар сушиден уланып, 8 адам жұмыстан шеттетілді

АҚТӨБЕ. KAZINFORM - Ақтөбеде суши жеткізу орнының 8 жұмысшысы әзірге еңбекке араласа алмайды. Эпидемиолог мамандар бірнеше сынама алды.

Ақтөбеде суши жеп, ауруханаға түскен адамдар қазір ем қабылдап жатыр. Ал қалалық санитариялық-эпидемиологиялық бақылау департаментінің мамандары 8 қызметкерді жұмыстан шеттетті.

- Барлығы 8 адамның уланғаны туралы дерек тіркелді. Оның төртеуі ауруханада жатыр, ал төртеуі үйден ем қабылдады. Ақтөбе қалалық санитариялық-эпидемиологиялық бақылау департаменті өнімнен сынама, құрал-жабдықтардан жұғынды алып, талдау жүргізу үшін зертханаға жіберді. 8 адам жұмыстан шеттетілді. Тексеру жалғасып жатыр,- деп хабарлады облыстық санитариялық-эпидемиологиялық бақылау департаментінің баспасөз қызметі.

Бұған дейін хабарлағанымыздай, облыстық клиникалық инфекциялық ауруханаға түскен 8 адамның екеуі бала.