Ақтөбеде уланған балалар ауруханадан шықты

АҚТӨБЕ. KAZINFORM - Қобда ауданының ауруханасында ем қабылдаған оқушылар түгел үйлеріне шығарылды.

Қобда ауданы Қобыланды батыр атындағы орта мектеп оқушыларының денсаулық жағдайы жақсы, бүгін олар үйлеріне шықты.

- Бүгін 9 бала ауруханадан шықты. Өзгелері сол күні, кеше жіберілді. Балаларға астан улану диагнозы қойылды,- деп хабарлады Ақтөбе облыстық денсаулық сақтау басқармасының баспасөз қызметі.

Айта кетейік, алғашында балалардың тәттіден уланғаны туралы айтылды. Бір сыныптың 23 оқушысы ауруханаға жеткізілді.

Балаларды қарауға облыстан педиатр, инфекционист мамандар барды.

Қазіргі кезде Ақтөбеде эпидемиолог мамандар тексеру жүргізіп жатыр. Дүкен иесінде арнайы құжаты болмады, өнімде техникалық регламенттерге сәйкес таңбалары жоқ.