Ақтөбеде зауыт аумағында күйдірілген тас көмір қоймасы өртенді
АҚТӨБЕ. ҚазАқпарат - Ақтөбеде зауыт аумағында өрт шықты. Металлургия пештеріне отынға қолданатын күйдірілген тас көмір қоймасы жанды, деп хабарлайды ҚазАқпарат тілшісі.
Бүгін сағат 14:15-те кезекші бөлімге хабарлама түсіп, Ақтөбе ферроқорытпа зауыты аумағына өрт сөндірушілер жіберілді.
Мұнда металлургия пештеріне отынға қолданатын күйдірілген тас көмір қоймасы жанды.
Өрт сөндіруге 9 техника мен 35 адам жіберілді.
Сонымен бірге жеке өрт сөндіру қызметінен 2 техника және 8 адам көмектесті.
Өрт 15:30-де сөндірілді.
«Отқа оранған қойманың ауданы - 250 шаршы метр. Адам шығыны жоқ. Облыстық ТЖД өрт қауіпсіздігі ережесін қатаң сақтауға, өрт тіркелсе 101, 112 телефон нөміріне хабарласуға шақырады»,- деді облыстық ТЖД баспасөз қызметі.
