Ақтөбеде жаппай төбелеске қатысқан 10 айыпталушының ісі сотта қаралып жатыр

АҚТӨБЕ. KAZINFORM — Жастар арасындағы төбелес Ақтөбенің орталық саябағында басталған. Кейін інісі ағасына айтып, екі тарап кездеседі. Жаппай төбелес кезінде қару қолданып, жәбірленушіні өлімші етіп сабаған айыпталушылар сотта жауап беріп жатыр.

Ақтөбе облыстық қылмыстық істер жөніндегі мамандандырылған ауданаралық сотында 32 жәбірленуші мен 10 айыпталушының ісі қаралып жатыр. Іс материалына сүйенсек, былтыр 26 маусым күні Ақтөбе қаласының орталық саябағында кәмелет жасқа толмаған бозбала өз қатарласын ұрып жіберген. Кейін ол бұл жайында ағасына айтып, ағасы әлеуметтік желі арқылы өз інісін ұрған бозбаланы іздейді. Екі тарап кездесуге келісіп, кездесу орнын № 1 орта мектеп ауласына белгілейді. Кездесу орнына бір тарап топ болып жиналып барып, екіншісінде ағасы екі досын ертіп барады. Сол кезде інісіне жасағанын еске салған айыпталушы сотта жәбірленуші болып отырған бозбалалардан өтеуіне 300 мың теңге ақша мен қымбат маркалы ұялы телефон талап еткен. Бірақ олар келіспей, кездесу орнын Мал базарындағы автотұраққа белгілейді.

— Мылтық, пышақ қолдану арқылы дене жарақатын салуды жоспарлап, бір топ жігітті жинайды. Бірі спорт клубының жаттықтырушы екенін пайдаланып, балалардың тиіскенін сылтау етіп, қорқытып алуға ұсыныс жасаған. Ұсыныстың заңсыз екенін біле тұра бір топ жігіт келіскен. Кейін ақылдасып, бірі иелігіндегі бесатар атыс қаруын алып шығуға келісті. Сол кезде олар күш қолдануды, көлікпен қағып кетуді ақылдасады. Мал базары аумағындағы автотұраққа жиналып, бірі екіншісіне мылтықты оқтап берді. Қарудан оқ атылып, қаша бастағанда бірі көліктің доңғалағы жанында отырып қалады. Жәбірленушінің сүйеніп отырған айыпталушылар көріп, тепкілеп ұрады. Бірі сол жерде қаза болды, — деді мемлекеттік айыптаушы. 

Қылмыстық іс «Адам өлтіру», «Қорқытып алу» баптары бойынша қаралып жатыр.

Еске салсақ, жастар былтыр жазда төбелесіп, бір адам көз жұмды, 8-і ауруханаға түсті.

Кейін прокуратура атып, көлікпен қағып өлтіргенін хабарлады.