Ақтөбеде жоғалған жігіттің мәйіті табылды

АҚТӨБЕ. ҚазАқпарат - Ақтөбе қаласының базарында белгісіз көлікке мініп кеткен Ерхан Тілеумбетовтің денесі табылды, деп хабарлайды ҚазАқпарат тілшісі.

«Ерханның қаза болғанын бүгін хабарлады. Полиция қызметкерлері сот-медициналық сараптама тағайындады»,- деді Ерхан Тлеумбетовтің әйелі Маржан Ошақова.

Мәлім етілгендей, мәйіт Ақтөбе қаласының Сазды ауылдық округі маңынан табылған. Ерхан Тілеумбетовті туыстары киім-кешегі арқылы таныған.

Бұған дейін хабарлағанымыздай, 31 жастағы Ерхан Тлеумбетов 3 тамыз күні базар ішінде белгісіз көлікке мініп кетіп, содан ізім-ғайым жоғалған. Оның көлікке мінген сәті базар ішіндегі бейнекамераға түсіп қалған. Сол уақыттан бері құқыққорғаушылар іздестіру жұмыстарын жүргізді.