Ақтөбеде жұмыс орнында сіріңке тұтатқан кәріз стансасы операторының денесін түгел күйік шалды
Ақтөбе облысы әкімінің баспасөз қызметінің хабарлауынша, оқиға кеше сағат 22:55-те тіркелді. Кеңқияқ ауылдық ауруханасына «Кеңқияқ-СК» КМК кәріз-сорғы стансасында жұмыс істейтін оператордың күйік шалып түскені белгілі болды.
«Алдын ала болжам бойынша, оператор кәріз жинау бекетінің есігін ашып, шырпы тұтатқан. Күйік шалған кезде бірден күйеуіне хабарласып, ол ауруханаға жеткізген. Қазіргі кезде кәріз стансасы штаттық режимде жұмыс істеп тұр. Тергеу жұмыстары жүріп жатыр. Алғашқы анықталған себебі – өрт қауіпсіздігі ережесінің сақталмауы. Науқастың денесінің 90-95%-ын күйік шалды. Кеңқияқ ауылдық ауруханасы алғашқы көмек көрсетті. Ал түнде әйел санавиациямен облыс орталығына жеткізілді», - деп ақпарат таратты облыс әкімінің баспасөз қызметі.
Еске салсақ, Ақтөбенің Кеңқияқ ауылында бұған дейін мұнай-газ кешені өртеніп, төрт жұмысшыны күйік шалды. Олар облыс орталығы мен Астана қаласындағы ауруханаға жеткізілді. Екі жұмысшы ауруханада көз жұмды.