Ақтөбедегі 250-ден астам аялдамада әлі күнге дейін павильон жоқ
Ақтөбе қаласы бойынша жаңа тұрғын алаптарына аялдама павильонын салу жұмысы әлі кешеуілдеп тұр. Биыл күз келгенде 56 павильон салу жұмысына келісімшарт жасалды, деп хабарлайды Kazinform.
Биыл 56 аялдама павильоны салынуы тиіс
Ақтөбе қаласындағы жаңа тұрғын үй алаптарында және шаһардың ескі бөлігінде жаңбыр мен қар жауғанда қорғанатын, жел күні ықтайтын 56 жаңа павильон салынуы тиіс.
Қала әкімі баспасөз қызметінің жетекшісі Айгүл Байменованың айтуынша, мердігер мекеме – «REGION-04 Service» ЖШС-і. Серіктестік Есет батыр, Жібек жолы тұрғын алаптары мен Малышка ауданында жаңа павильон салу, тоғызы жеткенін ауыстыру міндетін мойнына алған.
Kazinform Мемлекеттік сату сайты арқылы Ақтөбе қаласы тұрғын үй-коммуналдық шаруашылығы, жолаушылар көлігі жәнек автомобиль жолдары бөлімінің басшысы Болат Серіков пен «REGION-04 Service» ЖШС-і басшысы арасында 49 млн теңгеге келісімшарт жасалғанын анықтады. Конкурс биыл маусым айында жарияланғанымен, жеңімпаз қыркүйек айының соңында ғана белгілі болды. Талап бойынша мердігер жыл соңына дейін 56 павильонды орнатуға міндетті. Сонымен бірге бір жылдық кепілдігі бар. Орта есеппен әр аялдама павильонының құны 800 мың теңгеден асады.
Аялдама павильондарын жөндеуге 16 миллион теңге бөлінді
Ақтөбе қаласы бойынша барлығы 757 аялдама бар. Оның 506-ында павильон орнатылған. Демек 250-ден астамында әлі күнге дейін тұрғындарға еш жағдай жасалмаған.
Қала әкімі баспасөз қызметінің жетекшісі Айгүл Байменованың айтуынша, жаңасын салумен қатар жөндеу жұмыстары да жүргізілуі тиіс. Биыл бұл жұмысты «Байұлы НС» ЖШС-і өз міндетіне алған. Мемлекеттік тапсырыс аясында кем-кетігі бар аялдама павильондарындағы орындықтарды жөндеу, бояу, дәнекерлеуге 16,8 млн теңге бөлінді.
Мемлекеттік сатып алу сайтындағы ақпаратқа сүйенсек, жұмыс биыл жыл соңына дейін жүргізіледі.
Темір, әйнек павильондар мен ашық аспан астындағы күту алаңы
Ақтөбе қаласында әйнектен жасалған аялдама орнату жұмысы 2017 жылдан басталды. Ол кезде орталық көшелерге басымдық берілді. Сонымен бірге қазіргі кезде 16 жылы аялдама жұмыс істеп тұр. Бұл аялдама павильондары қаланың орталық бөлігінде орналасқан.
- Барлық жылы аялдамалар ретке келтіріліп, қыс мезгіліне дайындалып жатыр. Әзірге 16 жылы аялдама бар. Келесі жылы да жылы аялдамалар салу үшін қалалық сәулет және қала құрылысы бөлімі инвесторлармен сөйлесіп жатыр,- деді Ақтөбе қаласы әкімінің баспасөз хатшысы Айгүл Байменова.
Kazinform тілшісі қаланың бірнеше бөлігін аралап, аялдамалардың күйін көріп шықты. Мәселен халық көп шоғырланатын Орталық базардағы аялдама павильоны жаз айында сүріліп, жаңасы салынуы тиіс еді. Бірақ аялдамадағы орынды жалға алған кәсіпкер құрылысты аяқтауға асығар емес. Қазір темір қаңқасы бар, ал адамдар сауда орнын жаңалап, ағаштарды паналап тұр.
Сондай-ақ қаладағы әйнектен жасалған аялдамаларға жарнама ілу тоқтамай тұр. Оны жуып, ретке келтіру жұмысын Ақтөбе қалалық тұрғын үй-коммуналдық шаруашылық, жолаушылар көлігі және автомобиль жолдары бөліміне бақылауы тиіс болса да қазіргі кезде адам шошырлық кейіпке енген.
Ақтөбе облыстық ПД баспасөз қызметінің жетекшісі Ерболат Сарқұловтың айтуынша, биыл 7 мыңға жуық ұсақ бұзақылық тіркелді. Оның ішінде аялдамаларды бүлдірген, сындырғандар да бар.
