Ақтөбедегі газ құю бекеттерінде әлі де ұзын-сонар кезек бар

АҚТӨБЕ. KAZINFORM – Ақтөбе қаласында газ әлі де тапшы. Ұзын-сонар кезек барлық газ құю бекетінде бар. 

Жаз айларында басталған тапшылық күз келгенде әлі жалғасып жатыр. Қыркүйек пен қазан айларында ұзын-сонар кезек түзеліп, жүргізушілер сағаттап күтуге мәжбүр.

– Бүгінгі күні Ақтөбе облысының әкімдігі газ тапшылығын және автогаз құю станцияларында кезекті болдырмау мақсатында бірқатар жұмыс атқарды. Атап айтқанда «СНПС-Ақтөбемұнайгаз» АҚ-мен арадағы келісім бойынша 1 қараша күні 36 вагон (1 296 тонна) газ жөнелтіледі. Бұл газ болжам бойынша 2 қарашада бекеттерге жеткізіледі. Сондай-ақ өңірге газдың қосымша көлемін бөлу мәселесі пысықталды. Нәтижесінде Шымкенттік зауыттан 900 тонна газ бөлінді. Бұл сұйытылған газ өңірге 7-8 қараша күндері жеткізіледі деп жоспарланған. Газ тапшылығы мәселесі алдағы демалыс күндері шешілуі мүмкін. Аталған мәселе бақылауда болып, өзге де жұмыстар атқарылады, - деп хабарлады Ақтөбе облыстық кәсіпкерлік басқармасы.

Бұған дейін ҚР Энергетика министрлігі қазан айына 11 388 тонна газ бөлгенін жазған едік.

Энергетика министрлігі газ тапшылығы мәселесін бағаның төмен болуымен байланыстырды.