Ақтөбенің орталық саябағында құлаған шырша қайта орнатылады
Ақтөбе қаласындағы Жаңа жылдық кештер мен мәдени шаралар өтетін орында шырша жоқ. Түнде қатты желдің салдарынан шайқалып, жасанды шыршаның темір қаңқасы сынып кеткен. Қалалық әкімдік бұл жұмысты басқарушы компанияға тапсырды.
«Шыршаның ұзындығы - 18 метр. Орталық саябақтағы шыршаны қайта қалпына келтіру үшін 2-3 күн қажет. Қазір дәнекерлеу жұмыстары жүріп жатыр. Кейін бәрі қалпына келтіріліп, шамдары жағылады»,- деді Ақтөбе қалалық тұрғын үй-коммуналдық шаруашылығы бөлімінің сектор меңгерушісі Хасен Юсупов.
Айта кетейік, 30 желтоқсан күні саябақта Аяз ата мен Ақшақарлар байқауы өтеді. Сонымен қатар, мұнда мұз мүсіндер жасалып жатыр. Ал 31 желтоқсанда түні бойы мерекелік қойылым, музыкалық шоу өтіп, жаңа жылдық құттықтаулар айтылады деп жоспарланған.