Ақтөбенің Жылтыр ауылында құм тоқтату жұмысы басталды
АҚТӨБЕ. KAZINFORM — Ақтөбе облысы Шалқар ауданы Жылтыр ауылында құм тоқтату жұмысы басталды. Ауылға 20 мың түп көшет егіледі.
Шалқар ауданы Жылтыр ауылының тұрғындары құм тек қораға емес, үйге де кіре бастағанын айтып, былтыр көмек сұрады. Биыл құм тоқтату жұмысы басталып кетті.
— Шалқар ауданындағы Жылтыр ауылында көшпелі құмды тоқтату жұмысы қолға алынды. Көшетті «Үлкен-Борсық орман және жануарлар дүниесін қорғау мекемесі» КММ-і егіп береді, — деді Ақтөбе облыстық Табиғи ресурстар және табиғатты пайдалануды реттеу басқармасының бөлім басшысы Еркебұлан Таласпаев.
Ал Шалқар ауданы әкімдігі таратқан ақпаратқа сүйенсек, биыл жергілікті бюджеттен 7 млн теңге бөлінді. Жұмысты өз міндетіне алған «Аманбаев» ЖК-і құм шығару жұмысын жүргізіп жатыр. Кейін көшет егу жұмысы басталады.
Айта кетейік, Ақтөбеде барлығы 19 ауылда құм көшкіні мәселесі бар. Олар Темір, Ырғыз, Шалқар, Байғанин аудандарында орналасқан.
