Албания премьер-министрі тәртіпсіздіктерге сыртқы күштерді айыпты етіп көрсетті
АСТАНА. KAZINFORM — Албанияда төрт күннен бері наразылық білдірушілер биліктің отставкаға кетуін талап етіп отыр, ал премьер-министр Эди Рама елді тыныштыққа шақырып, толқуға белгісіз «сыртқы күштерді» кінәлады, деп хабарлайды Euronews.
— Бұлар Албанияда бейбітшілік орнауын қаламайтын сыртқы күштер. Мұның бәрі Албания оппозициясын кеңірдегінен ұстаған бір қолдың ісі, ол Албанияны бұған дейін де бірнеше рет өртеп, қиратқан, — деді ол Facebook-тегі бейне жолдауында.
Мыңдаған жас Албания астанасының көшелеріне шығып, білім беру саласына реформа жүргізуді талап етті.
Наразы топ қоқыс жәшіктерін өртеп, кейбір дүкендерді қиратты және бағдаршамдарды зақымдады, жолдарды жауып тастады және полицияға тас лақтырды. Құқық қорғау органдары көзден жас ағызатын газ бен су шашты.
Сейсенбіде басталған наразылықтар Тирана аумағынан шығып Албанияның басқа қалаларына да тарады. Толқу өршіген тұста студенттер сабаққа барудан бас тартып отыр.
Осының алдында Балқан елінде бірнеше ай бойы үкіметке қарсы наразылық акциялары болған еді. Толқудың бір себебі Дональд Трамптың қызы Иванка мен оның күйеуі Джаред Кушнермен байланысты туристік кешен жобасымен байланысты. Бұл жоба Албаниядағы сыбайлас жемқорлық пен теңсіздіктің артуының символына айналған.
Раманың Социалистік партиясы былтыр қатарынан төртінші рет сайлауда жеңіске жетті. Келесі парламенттік сайлау 2029 жылға жоспарланған. Үкімет Албанияның 2028 жылға қарай Еуропа Одағына қосылуын мақсат еткен.
