Алдағы қыста Павлодар облысына 580 мың тоннадан астам көмір қажет
ПАВЛОДАР. KAZINFORM - Павлодар облысындағы әлеуметтік мекемелер мен жеке секторлар үшін алдағы қысқа 580 мың тоннадан астам көмір қажет. Өңірдің алдағы жылу маусымына дайындығы қандай деңгейде? Осы орайда өңірлік энергетика және тұрғын үй-коммуналдық шаруашылық басқармасының басшысы Ержан Иманзайыповты әңгімеге тарттық.
- Ертіс-Баян өңірі қысқа қажет отынды қаншалықты қамдап үлгерді?
- Күздің қара суығында сұраныстың өсіп шыға келетінін ескере отырып біздің басқарма қала-аудан әкімдіктеріне қатты отынды уақытылы дайындау бойынша қажетті шараларды қабылдау туралы ескертіп жатыр. Облыс аумағында әзірше күн жылы, бірақ қыркүйек айында күн салқындап жер үйлер пеш жағудың қамына кіріседі. Соған орай облыста көмірге сұраныс біртіндеп өсе бастайды. Аймағымыз бойынша 20-дан астам өңірлік оператор бар, олар облыс халқы мен әлеуметтік объектілерге көмірді жеткізуді, сақтауды және сатуды ұйымдастырады. Қазіргі уақытта бюджеттік ұйымдар алдағы жылыту маусымына көмір сатып алудың барлық конкурстық рәсімдерін аяқтады. Бюджеттік мекемелерге жалпы көлемі 240 мың тонна көмір қажет болса, қазіргі уақытта оның 198 мың тоннасы жеткізілді.
- Көмір бағасы биыл қымбаттауы мүмкін бе?
- Павлодар облысында көмір өндіретін 6 кеніш бар. Атап айтқанда, «Богатырь-Көмір» ЖШС, «Майкубен-Вест» ЖШС, «Гамма Талдыкөл» ЖШС, «Гамма Сарыкөл» ЖШС, «Ангренсор Энерго» ЖШС, «Шығыс кеніші» ЖШС. Халық негізінен жергілікті кеніштер арасында «Майкөбе» кенішінің көмірін құп көретіні жасырын емес. Аталған компанияда бүгінде көмірдің бір тоннасы 8300 теңгеден босатылып жатыр. Ал «Богатыр» кенішінде тоннасы 5611,2 теңге тұрады. Баға былтырғы деңгейде сақталып тұр. Аталған кеніштермен бағаны ұстап тұру және көмірмен қамту саласында тұрақсыздыққа жол бермеуді көздейтін ынтымақтастық меморандумына қол қойылды. Сондықтан баға өзгермеуі керек.
Облыс бойынша, соның ішінде Павлодар қаласында көмір сатылатын теміржол тұйықтары бар. Көмір жеткізетін операторлар туралы барлық ақпарат, оның ішінде қоймаларының мекенжайлары және көмір сатып алуға болатын жерлер біздің Instagram парақшамызда, сондай-ақ қалалар мен аудандар әкімдіктерінің ресми ресурстарында орналасқан.
- Коммуналдық-тұрмыстық секторға шамамен қанша көмір қажет болады?
- Әлеуметтік сала объектілерін және облыс халқын қатты отынмен қамтамасыз ету үшін 2024-2025 жылдардың жылыту кезеңінде 585 мың тонна көмір жеткізілген. Оның ішінде бюджеттік ұйымдар үшін 210 мың тонна (88 мың тоннадан астамы білім беру ұйымдары үшін) және коммуналдық-тұрмыстық сектор үшін 375 мың тонна. Биылғы көлем де сол шамада болады деп ойлаймыз.
-Облыстағы қазандықтар мен жылу стансалары қысқа дайын ба?
-Жылыту маусымына дайындық аясында облыстың энергетика көздерінде 46 негізгі жабдықты жөндеу көзделген. Бүгінгі таңда 22 жабдықта жөндеу аяқталды, 19 жабдық жөнделу үстінде. Тағы 5 қазандықта жөндеу әлі жалғасып жатыр. Облыстың энергетикалық кешеніне жалпы белгіленген қуаты 8542 МВт болатын 7 энергия көзі кіреді. 2024 жылдың қорытындысына сүйенсек, облыстың энергия көздері «Богатырь Көмір» мен «Шығыс» кеніштерінен шамамен 34,3 млн тонна көмір және 39,1 мың тонна мазут сатып алып, тұтынған.
Бұған дейін биыл 7 айда Қазақстан қанша көмір экспорттағаны туралы жазғанбыз.
