Александр Бублик АҚШ-тағы жарыстың жартылай финалына жолдама алды

АСТАНА. KAZINFORM — Қазақстанның бірінші, әлемнің 82-ракеткасы Александр Бублик Финикс (АҚШ) челленджер турнирінің жартылай финалына шықты.

Қазақстандық теннисші ширек финалда әлемнің 79-ракеткасы, франциялық Корентен Мутемен жолықты.

Алғашқы партияда К.Муте 6:2 есебімен басымдылық танытты. Бұдан кейін А.Бублик ойын тізгінін қолына алып, камбэк жасай білді — 7:6 (7:4), 7:5.

Екі сағат 27 минутқа созылған тартысты бәсеке барысында Бублик 8 эйспен бірге 6 брейк-пойнттың төртеуін өз есебіне жазды. Муте 3 эйс, 5 брейкпен (8 брейк-пойнт) ерекшеленді.

Жүлде қоры 250 мың АҚШ долларына бағаланған жарыстың финалына шығу үшін Александр Бублик әлемнің 36-ыншы, турнирдің 1-ракеткасы, португалиялық Нуну Боржешпен таласады. 

Тағы бір қазақстандық, әлемнің 218-ракеткасы Тимофей Скатов Херсониссос 2 (Грекия) челленджер турниріндегі рейтингіде 376-сатыдағы болгариялық Димитар Кузмановқа 4:6, 3:6 есебімен есе жіберіп, жартылай финалға өте алмады.

Сондай-ақ Қазақстандық, әлемнің 322-ракеткасы Жібек Құламбаева Секешфехервар (Мажарстан) ITF W75 жарысының ширек финалында рейтингіде 219-орындағы украиналық Анастасия Соболевадан жеңіліп қалды — 1:6, 3:6.

Еске сала кетейік, бұдан бұрын Александр Бублик АҚШ-тағы турнирдің ширек финалына өткенін жазған болатынбыз.