Александр Бублик ATP турнирлеріндегі сегізінші титулын жеңіп алды

АСТАНА. KAZINFORM — Қазақстанның бірінші, әлемнің 19-ракеткасы Александр Бублик Чанчжоу (Қытай) АТР 250 турнирінде үздік шықты. 

Жарыстың 3-ракеткасы болып тіркелген қазақстандық теннисші финалда дүниежүзілік рейтингіде 88-орында тұрған франциялық Валентен Руаемен чемпиондық атақты сарапқа салды.

Тартысты өрбіген бірінші партияда Бублик тай-брейкте қарсыласын тықсыра білді — 7:6 (7:4).

Екінші сетте де дәл осындай есеп тіркелді ' 7:6 (7:4).

Бір сағат 53 минутқа созылған бәсекеде Александр Бублик 21 эйс жасады. Франциялық теннисші 8 эйстен аса алмады. Екеуі де 2 брейк-пойнтты пайдалана алмады.

Осылайша, Александр Бублик спорттық жолында ATP турнирлеріндегі сегізінші титулына қол жеткізді.

Еске сала кетейік, бұдан бұрын Александр Бубликтің Қытайдағы турнирде бас жүлде үшін таласатынын жазған едік.