Әлемнің әр түкпірінде жүрген ақтөбеліктер қыркүйекте бас қосады
АҚТӨБЕ. ҚазАқпарат - Қыркүйекте «Ақтөбе - құтты мекен» форумы өтеді. Шараға әлемнің түкпір-түкпірінде жүрген ақтөбеліктер қатысып, туған жердің дамуына үлес қосу, қолдан келер көмек беру мәселелерін талқылайтын болады, деп хабарлайды ҚазАқпарат тілшісі.
Елбасы Нұрсұлтан Назарбаевтың «Болашаққа бағдар: рухани жаңғыру» мақаласының «Туған жер» жобасы Ақтөбеде кең көлемде іске асыралуда. Бүгінде өңірде «Ақтөбе - құтты мекен» форумына дайындық жүріп жатыр. Қазіргі күні әлемнің 15 елінде тұратын 200-ден астам ақтөбелік туған жерге келіп, форумға қатысуға келісім берген.
«Туған жерге деген ықылас пен патриотизмді қалыптастыру мақсатында форум ұйымдастырып отырмыз. Ақтөбе жерінде туып-өсіп, жұмыс істеген жерлестерімізді өңірдің әлеуметтік-экономикалық дамуына үлес қосуға шақырамыз. Тізім жасалды. Барлығы 321 адамның аты-жөні мен оларға қатысты мәлімет жинақталды. Қазіргі күні әлемнің 15 елінде тұратын 218 адам форумға қатысуға келісім берді. Олардың қатарында кәсіпкерлер мен мәдениет, өнер қайраткерлері, спортшылар бар»,- деді форумды ұйымдастыру комитетінің төрайымы Сәния Қалдығұлова.
Форум аясында атақты ақтөбеліктер түрлі семинарлар өткізіп, шеберлік сабақтарын ұйымдастырады. Қайырымдылық концерттер болады. Ғылыми-тәжірибелік конференциялар өтеді. Форум кезінде бизнестің әлеуметтік жауапкершілігі аясында салынып жатқан Жастар сарайы, Жекпе-жек сарайы мен Шығармашылық академиясын ашу жоспарланған.
«Туған жер» бағдарламасы аясында «Туған жерге тағзым» акциясы өтіп жатыр. Алғашқы жартыжылдықта ақтөбеліктер құны 1 миллиард теңге болатын 338 жобаға қолдау көрсетті. Әлеуметтік нысандарды салу, қайта қалпына келтіру, оларды заманауи технологиямен жабдықтау, көгалдандыру, жол жөндеу жұмыстары жүрді»,- деді С. Қалдығұлова.
Айта кетейік, форумға орай Ақтөбеде zherlester.akt.kz интернет-ресурсы іске қосылды.
