Әлеуметтік тұрғын үй: Шымкентте жыл соңына дейін 1270 адамға пәтер беріледі
ШЫМКЕНТ. KAZINFORM — Шымкентте жыл басынан бері 2 004 азамат әлеуметтік тұрғын үймен қамтылды, жыл соңына дейін қосымша 1 270 пәтер беріледі. Бұл туралы қала әкімі Ғабит Сыздықбеков айтты.
«Есепті кезеңде (биылғы 10 ай — ред.) 978 мың шаршы метр тұрғын үй пайдалануға беріліп, бұл көрсеткіш өткен жылмен салыстырғанда 42 пайызға өсті. Жыл соңына дейін оны 1 миллион 360 мың шаршы метрге жеткізу көзделуде. Дегенмен, халық санының қарқынды өсуіне байланысты баспанаға деген қажеттілік өзекті болып тұр. Әлеуметтік тұрғын үй кезегінде тұрғандар саны 51 мыңнан асты. Мәселені шешу үшін 4 830 пәтерлі 92 әлеуметтік тұрғын үйдің құрылысы жүргізіліп, жыл соңына дейін 2 094 пәтерлі 55 тұрғын үй пайдалануға беріледі. Ал, жұмысшы жастарға және халықтың әлеуметтік осал топтарына 1 604 пәтер сатып алу қарастырылып, бүгінде оның 1 240-ы алынды», — деді қала басшысы ОКҚ алаңында.
Сонымен қатар, әкім жергілікті «Қамқор» тұрғын үй бағдарламасына бөлінетін қаржы 2 есе арттырылып, кемінде 400 отбасыға жеңілдетілген несие беруге 8 млрд теңге қаржы бөлінгенін айтты.
«Жергілікті бюджет есебінен әлеуметтік көмек ретінде табыс деңгейі төмен 392 отбасына тұрғын үй сертификаты берілді. Одан бөлек, «Отбасы банктің» тұрғын үй бағдарламалары арқылы 1 666 азаматты кредиттік тұрғын үймен қамтамасыз ету көзделген (Наурыз бағдарламасымен — 1 063 адам, Отау — 490 адам, Жасыл ипотека — 113 адам). Жалпы, есепті кезеңде 2 004 азамат әлеуметтік тұрғын үймен қамтылды, жыл соңына дейін қосымша 1 270 пәтер беріледі», — деп түйді сөзін Ғабит Сыздықбеков.
Айта кетейік, бұған дейін қала басшысы Шымкентте өңдеу өнеркәсібі саласында 12 жоба іске қосылып, 1000-нан астам жаңа жұмыс орны ашылғанын айтты.
Сонымен қатар, қалада жаңадан 2 индустриялық аймақ іске қосылғаны хабарланды.
Бұдан бөлек, Шымкентте еліміздегі ең үлкен жылыжай салынатыны айтылды.
Сондай-ақ, «Жайлы мектеп» ұлттық жобасы аясында Шымкентте 28 мың оқушыға арналған 18 мектеп салынады.
