Әлеуметтік желіде тікелей эфирге шыққан шымкенттік көлік жүргізушісі жауапқа тартылды
ШЫМКЕНТ. KAZINFORM - Ол көлігіне тыйым салынған құрылғыларды орнатқан.
Автокөлігін заңсыз жабдықтап, арнайы жарық сигналдарын орнатқан жүргізушіні полицейлер әлеуметтік желіден көрген. Мониторинг жүргізу барысында тікелей эфирге шыққан тұрғынның жүрген жерін бірден анықтаған.
Жедел басқару орталығының бейнебақылау инспекторлары құқық бұзушыны ұстауға патрульдік экипажды бағыттады.
- Жүргізуші әкімшілік жауапқа тартылды. Оның тарапынан аталған құқық бұзушылық биыл екінші рет қайталанғаны анықталды. Көлік құралы айыптұраққа қойылды. Құқық қорғаушылар көлік жүргізушілерін арнайы жарық және дыбыс сигналдарын заңсыз пайдалануға қатаң тыйым салынғанын ескертеді, - делінген Шымкент қаласы Полиция департаментінің баспасөз қызметі таратқан ақпаратта.
Айта кетейік, бұдан бұрын Шымкентте адам ұрламақ болғандардың әрекеті видеоға түсіп қалған болатын.
