«Алғашқы әскери дайындық» пәнінің атауы мен мазмұны өзгереді
АСТАНА. KAZINFORM - Мектептегі «Алғашқы әскери және технологиялық дайындық» пәнінің атауы мен мазмұны өзгереді. Бұл туралы Қорғаныс министрлігі Әскери білім және ғылым департаментінің бастығы, полковник Мұрат Олжабаев айтты.
- Білім беру ұйымдарында әскери іс негіздерін оқытудың міндетті пәні – бастапқы әскери және технологиялық дайындық. Қорғаныс министрлігі білім беру ұйымдарында бастапқы әскери дайындықты ұйымдастыруға жергілікті әскери басқару органдары арқылы көмек көрсетеді. Бұл органдар Бас штабтың Ұйымдастыру-жұмылдыру жұмыстары департаментіне тікелей бағынады, - деді ол Орталық коммуникациялар қызметіндегі брифингте.
Оның атап өтуінше, бүгінде Мәжіліс депутаттары бастапқы әскери және технологиялық дайындық пәнінің оқытушыларына қойылатын талаптарды күшейту бойынша ұсыныстар енгізді. Атап айтқанда, олар әскери қызмет өткеру немесе әскери кафедрада оқу тәжірибесінің болуы міндетті деп тануды ұсынып отыр. Осыған байланысты, қолданыстағы заңнамаға өзгерістер мен толықтырулар енгізу жұмыстары жүргізілуде. Қазіргі уақытта заң жобасы Мәжілісте қаралуда және бірінші оқылымнан өтті.
- Қорғаныс министрлігі «Алғашқы әскери және технологиялық дайындық» пәнінің оқу бағдарламасын «Отан қорғаушы» деп өзгерту жөнінде пилоттық жоба ұсынды. Сонымен қатар, осы пәннің тақырыптық жоспары әзірленді, - деді департамент бастығы.
Мұрат Олжабаевтың дерегінше, жаңа оқу бағдарламасына мынадай бөлімдер енгізіледі:
• мемлекеттің қауіпсіздігі мен қорғанысының құқықтық негіздері
• Қарулы күштер және Әскери доктрина
• әскери дайындық негіздері
• әскери қызмет негіздері
• ақпараттық қауіпсіздік негіздері
• әскери роботтар және жасанды интеллект
• өмір қауіпсіздігінің негіздері
• оқу-дала модулі
- «Отан қорғаушы» пәнінің жаңа оқу бағдарламасын енгізу 2026-2027 оқу жылдарына жоспарланған. Қазіргі уақытта ол Оқу-ағарту министрлігінде талқылау кезеңінде, - деді ол.
Бұған дейін биыл Бауыржан Момышұлы мен Талғат Бигелдинов атындағы әскери колледждер ашылатынын жазған едік.
