Алғашқы атом электр стансасының құрылысы қашан басталады – министр жауабы

АСТАНА. KAZINFORM – Энергетика министрі Алмасадам Сәтқалиев елімізде алғашқы атом электр құрылысының шамамен қашан басталатынын айтты.

- Халықаралық тәжірибеге сәйкес атом электр стансасының құрылысын жобалау үш жылға дейін созылады. Үш жылдан кейін «бетон» кезеңі, яғни құрылыс жұмыстары басталады. Жалпы құрылыс жұмыстары туралы айтатын болсақ, екі жылдың ішінде құрылысқа кірісеміз. Алайда нысанның негізгі құрылысы тек техникалық-экономикалық негіздеме аяқталғаннан кейін, жобалық құжаттама дайындалып, мемлекеттік органдардан барлық қажетті рұқсат алынған соң ғана басталады, - деді Алмасадам Сәтқалиев ведомствоның кеңейтілген алқа отырысынан кейін өткен баспасөз мәслихатында. 

Кеше Үкімет алғашқы атом электр стансасын Алматы облысының Жамбыл ауданы аумағында салу туралы шешім қабылдады. 

Еске сала кетейік, премьер-министр АЭС салуда экономикалық тиімділікті қамтамасыз ету қажет екенін айтқан еді. 

Сондай-ақ Қазақстандағы алғашқы АЭС 8 жылдың ішінде салынып бітуі мүмкін екені туралы жазған болатынбыз.