Алматы әуежайында жоғалған заттар аукционда сатылады — фейк

АЛМАТЫ. KAZINFORM — Әуежайда жоғалған жүктердің сатылымға шығатыны туралы ақпарат жалған. Бұл туралы Алматы әуежайы хабарлады.

Алматы халықаралық әуежайы жоғалған жүктердің аукционда сатылып жатқаны туралы әлеуметтік желідегі мәліметке сенбеуге шақырды.

— Әуежай ешқандай аукцион өткізіп жатқан жоқ. Егер сіз жоғалған жүктер сатылымы жөнінде жарнама көрген болсаңыз, сілтемесін бізге жіберіп, ол парақшаға шағымдануларыңызды сұраймыз. Мұқият болып, алаяқтардан сақ болыңыз, — деп хабарлады әуе айлағының баспасөз қызметі.

Еске салайық, бұған дейін Алматы — Анталья бағытындағы ұшақ ақауына байланысты Ақтау әуежайына қонғанын жазғанбыз. 

Сондай-ақ Алматы әуежайы ауа райына байланысты жолаушыларға жүгінген болатын.