Алматы облысында бір адамның он шақты иті 52 жастағы әйелді талаған
АЛМАТЫ. KAZINFORM – Әлеуметтік желіде жерде жатқан әйелді он шақты иттің талап жатқаны бейнелеген жазба тарады.
Желідегі мәліметке сәйкес, оқиға Қарасай ауданында болған.
Алматы облысының полиция департаменті иттердің 52 жастағы әйелге шабуыл жасауына байланысты қылмыстық іс тіркелгенін мәлімдеді. Қазіргі уақытта сотқа дейінгі тергеп-тексеру жүргізіліп жатыр.
Тәртіп сақшылары жәбірленушіге қажетті медициналық көмек көрсетілгенін атап өтті.
- Жедел-іздестіру шаралары барысында 60 жастағы иттердің иесі анықталды. Ол қоғамдық тәртіпті бұзғаны үшін ол заңнамада белгіленген тәртіппен жауапкершілікке тартылды, - деп хабарлады департаменттен.
Еске салайық, биыл Алматыда қаңғыбас жануарларды аулау, уақытша ұстау, ветеринариялық өңдеу және халықтың қауіпсіздігін қамтамасыз ету бойынша іс-шараларды жүзеге асыруға жергілікті бюджеттен 834,3 млн теңге бөлінді.
Бұған дейін Алматыда итті көліктен сүйреген жүргізушіге іс қозғалғанын жазғанбыз.
