Алматы облысында қолайсыз ауа райына байланысты автожолдар жабылды

ҚОНАЕВ. KAZINFORM – Алматы облысында ауа райының күрт нашарлауына байланысты бірқатар бағыттарда көлік қозғалысына шектеу енгізілді, деп хабарлайды облыстық ТЖД.

- 11 желтоқсан күні сағат 17:40-та «Астана – Қарағанды – Алматы» автожолының 2295-2380 шақырымдары аралығында (Қаншеңгел ауылынан Күрті ауылына дейін) барлық көлік түрінің қозғалысы тоқтатылды. Жолды 12 желтоқсан күні сағат 07:00-де қайта ашу жоспарланып отыр, - делінген ҚазАвтоЖол таратқан ақпаратта.

Сонымен қатар, сағат 18:00-де «Қонаев – Күрті» автожолының 0-67 шақырымдары аралығында да көліктің барлық түріне қозғалысқа шектеу қойылды.

Бұл бағыт та 12 желтоқсанда сағат 07:00-де ашылады деп күтіледі.

Тәулік бойы қосымша ақпарат алу үшін 1403 байланыс орталығына хабарласуға болады.

Айта кетейік, бүгін Абай облысында 13 жеңіл және 25 жүк көлігі жолда қалып қойғаны хабарланды.