Алматы сан түрлі түске боялды – фоторепортаж
АЛМАТЫ. KAZINFORM — Алматыда ағаштар бүршік жарып, көктемнің хош иісі аңқыды. Алматылықтардың әдемі көңіл күйі Кazinform тілшісінің фоторепортажында.
Алматы — көктемде ерекше әсемденіп, мың түске боялады.
Қазір қалада ең алдымен өрік, шие ағаштары гүлдеп, қаланың көркіне сұлулық қосуда.
Айнала жасыл түске боялып, қала ішінде хош иіс аңқиды.
Қала тұрғындары да көп уақытын далада өткізіп, таза ауада жиі серуендеп жүр.
Бұрынғылар бұл ай туралы «Сәуір айы — қазақтың тәуір айы» деген.
Ал ақиық ақын Мұқағали Мақатаев «Сәуір айы шопанға сарыуайым, малмен бірге бағады ауа райын» деп жырлады.
Сондай-ақ бұл ай туралы халқымызда «Наурыз — суымен, сәуір — нуымен, мамыр — гүлімен», «Сәуір болмай, тәуір болмас» деген мақал-мәтел, қанатты сөздер бар.
Жасыл желекке оранған саябақтардың сұлулығын сөзбен суреттеу мүмкін емес. Оны тек көзбен көру керек.
Әсіресе, Есентай өзенінің жағалауындағы таңғажайып көрініс ешкімді де бейжай қалдырмайды.
Бұған дейін Алматының ботаникалық бағында бәйшешек гүлдегені туралы жазғанбыз.
