Алматы тұрғыны вокзалда бомба туралы жалған хабар бергені үшін 4 жыл арқалады

АСТАНА. KAZINFORM — Алматы қаласының 44 жастағы тұрғыны теміржол вокзалдарында жарылғыш зат қойылғаны туралы бірнеше жалған хабар бергені үшін 4 жылға бас бостандығынан айырылды. Бас көлік прокуратурасы мәлім етті. 

Ол жазасын өтеу барысында төрт рет таксофон арқылы қоңырау шалып, жарылғыш зат қойылғаны жайлы хабарлаған.

— Оның әрекеттері эвакуация мен төтенше қызметтердің жұмылдырылуына себеп болды. Жалған дабылдың салдарынан мемлекеттік органдарға келтірілген шығын 3,3 млн теңгеден асты. Жүргізілген сараптамалар қоңырау шалған адамның жеке басын және оның сөздерінде тікелей қауіптің болғанын растады, — делінген хабарламада.

Сот ер адамды Қазақстан Республикасы Қылмыстық кодексінің 273-бабы бойынша кінәлі деп таныды.

Сотталушы мемлекетке келтірілген шығынды өтеуге және өтемақы төлеуге міндетті.

Көлік прокуратурасы мұндай қылмыстар қоғамдық қауіпсіздікке қауіп төндіріп, ауыр салдарға әкелетінін ескертеді.

Еске сала кетейік, бұған дейін Өскеменде «полиция бөлімшесіне бомба қойдым» деп әзілдеген әйел ұсталған болатын.