Алматы зообағын басқа қалаға көшіре ме
АЛМАТЫ. KAZINFORM — Алматы зообағын басқа қалаға көшіру жоспарда жоқ. Бұл туралы мәдениет басқармасы мәлім етті.
Осыған дейін Алматы зообағы Алатау қаласының аумағына көшірілетіні туралы ақпарат пайда болған еді.
Алматы қалалық мәдениет басқармасы зообақ жұмысын бұрынғы жерде жалғастырып жатқанын және басқа қалаға көшіру жоспарда жоқ екенін мәлімдеді.
— Алматы қаласының аумағын дамыту жоспары аясында зообақ халықаралық стандарттарға сәйкес зоогеографиялық қағида бойынша жаңғырту мен реконструкциялау көзделген. Биыл жобалау-сметалық құжаттаманы әзірлеу бойынша байқау жариялау жоспарланған. Реконструкциялау жұмыстары кезең-кезеңімен 2028 жылға дейін жүзеге асырылады, - деп хабарлады басқармадан.
Жоспарланған жаңғырту жұмыстары аясында жүргізілетін жұмыстар жануарларды ұстау жағдайын айтарлықтай жақсартып, хайуанаттар бағына келушілер үшін жайлылық деңгейін арттыруға мүмкіндік береді.
Осыған дейін Алматы зообағында ширек ғасыр өмір сүрген Хан есімді керіктің көз жұмғаны туралы жазған едік.
