Алматыда 13 дүңгіршек бұзылды
АЛМАТЫ. KAZINFORM — Алматыда мемлекеттік қордың жерінде заңсыз орнатылған стационарлық емес сауда нысандарын бөлшектеу жұмыстары жалғасып жатыр.
Алматы әкімдігінен мәлім еткендей, Медеу ауданында заңсыз орнатылған стационарлық емес сауда нысандарын бұзу жұмыстары толық аяқталды. Онда кондитерлік өнімдер мен көше тағамдары сатылған.
— Жангелдин көшесі, 22/1, Чайкина көшесі, 3, Жолдасбеков көшесі, 9/1, Самал-2 шағын ауданы, 2А, Тәттімбет көшесі, 9/1, Пушкин көшесі, ½ және 28 гвардияшы-панфиловшылар саябағында орналасқан 6 нысан күрделі құрылысқа жатады. Сондықтан олардың тізімі жер ресурстарын басқару департаменті мен қала құрылысын бақылау басқармасына әрі қарай шара қабылдау үшін жіберілді, — деп хабарлады әкімдіктен.
Қазір мемлекеттік қор жерлерінде орналасқан 300-ден астам заңсыз нысан 222 ойын автоматы бұзылды. Сонымен қатар 32 күрделі құрылыс анықталып, оларды мәжбүрлі түрде бұзу үшін сотқа талап-арыз жолданды.
Заңсыз орнатылған инженерлік желілерді ажырату жұмыстары жалғасып жатыр, ал қалған 210 дүңгіршек 15 наурызға дейін бұзылады.
Айта кетейік, қалада 157 стационарлық емес сауда нысандарын орналастыруға арналған 142 орын бекітілген.
Еске салсақ, бұған дейін стационарлық емес заңсыз сауда нысандардың бұзылатыны туралы жазған едік.
