Алматыда мемлекетке қайтарылған 12 актив аукционға шығарылады

АЛМАТЫ. KAZINFORM - Алматыда өткен жылы мемлекетке қайтарылған 5 актив сатылды.

Kazinform агенттігінің сауалына жауап берген «Қайтарылған активтерді басқару компаниясы» ЖШС былтыр сатылған активтердің жалпы сомасы 10,8 млрд теңге болғанын мәлімдеді.

- 2024 жылы басқарушы компания Алматы қаласында 5 активті аукционда сатты, оның ішінде 2 жер учаскесі (біреуі аяқталмаған құрылыс нысанымен), 1 коммерциялық жылжымайтын мүлік, 1 өндірістік база, 1 әкімшілік ғимарат бар. Сатылған активтің ең жоғары сомасы - 6 278 384 321 теңге болса, ең төмені - 657 596 616 теңгеге жетті, - делінген компания жауабында.

Қазіргі уақытта басқарушы компанияның иелігінде Алматы қаласында орналасқан 12 актив бар. Олардың жалпы құны - 28,5 млрд теңге. Атап айтқанда, 7 жер учаскесі, 3 компанияның жарғылық капиталындағы үлес, 2 жылжымайтын мүлік (кеңсе ғимараттары).

- Аукцион өткізу жақын араға жоспарланған, - деп хабарлады компаниядан.

Еске салайық, «Қайтарылған активтерді басқару компаниясы» 2023 жылғы 21 қыркүйекте құрылған. Толықтай мемлекет меншігіне тиесілі компания мемлекетке қайтарылған активтерді қабылдап, активтер сатылғанға дейін оларды жалға беру, сенімгерлік басқару, өз бетімен басқару арқылы үздіксіз жұмыс істеуін қамтамасыз етеді.

Бұған дейін Алматыда қанша ғимарат мемлекетке қайтарылып, аукционда сатылғанын жазғанбыз.