Алматыда метро мен вокзал жерасты тоннелі арқылы байланысады

АЛМАТЫ. KAZINFORM — «Алматы-2» темір жол вокзалы мен «Райымбек батыр» метро бекетінің арасында жерасты тоннелі салынады.

Қалалық мобильділік басқармасы Kazinform сауалына жауап беріп, құрылыс жобасы әзірленіп жатқанын растады.

— «Алматы-2» темір жол вокзалы мен «Райымбек батыр» метро бекеті бір-бірінен айтарлықтай алшақ орналасқан. Бұл маңызды көлік тораптары арасында жолаушылардың ауысып отыруын қиындатады. Осыған байланысты жерасты тоннелі бір тораптан екіншісіне қауіпсіз әрі жылдам баруға мүмкіндік береді, — деп хабарлады басқармадан.

Жоба бойынша тоннелдің ұзындығы 485 метр, ені 6,3 метр және биіктігі 3 метр болады. Оған қоса, 42 метр болатын қосымша жерасты дәліз, екі кіреберіс, екі лифт шахтасы және апаттық шығу жолы салынады. Одан бөлек жарнама тақталары мен жол белгілері қойылады.

— Жобаның құны мемлекеттік сараптаманың қорытындысы бойынша белгілі болады, — делінген басқарма жауабында.

Құрылыс жұмыстары 2025 жылдың үшінші тоқсанында басталып, 12 айдан кейін аяқталады деп жоспарланған.

Еске салайық, бұған дейін Алматыда екі көпқабатты автотұрақтың жобасы әзірленіп жатқанын жазғанбыз.