Алматыда Ораза Айт мерекесі тойланып жатыр
АЛМАТЫ. KAZINFORM — Алматы мешіттерінде Айт намазы оқылды.
Қасиетті Рамазан айы аяқталғаннан кейін мүмін мұсылмандар таңертең мешітке барып Айт намазын оқиды. Қазақ жерінде қай заманнан бар дәстүр бүгінгі күні де өз жалғасын тауып келеді.
Бүгін Алматыда Айт намазы таңғы сағат 07:00–де оқылды. Бірақ алматылықтар қала мешіттеріне таңғы 6-дан бастап ағыла бастады. Автобуста, көшеде жайнамаз ұстап, басына тақия киген адамдардың қарасы көп болды.
Бүгін мұсылман қауымының мерекесі үшін Алатау ауданы Бауыржан Момышұлы көшесінің бойындағы жаңадан салынған үлкен мешіт бір күнге ашылды. Діни нысанның құжаттары әлі толық дайын болмағандықтан, ол кейін уақытша қайта жабылады.
— Ардақты алматылықтар! Баршаңызды Ораза айт мерекесімен шын жүректен құттықтаймыз! Қала тұрғындары мен мешіт жамағатына қолайлы жағдай жасау үшін және мешіт аулаларындағы көлік қозғалысын реттеу мақсатында Алматы қаласы, Бауыржан Момышұлы көшесінің бойындағы үлкен мешіт Ораза айт мерекесіне бір күнге ашылады. Алайда, мешіт құжаттарының толық болмауына байланысты айт намазынан кейін қайта уақытша жабылады. Құжаттары толықтай рәсімделіп, тіркеуден өткен соң ресми түрде ашылатын болады, — деп жазды әлеуметтік желіде Алматы қаласының бас имамы Төлеби Оспан.
Жаңа мешіт маңында үлкен автотұрақ болғанына қарамастан, келген көліктің көптігінен жүргізушілер көлікті екінші-үшінші қатармен тұраққа қойып жатты. Ал Бауыржан Момышұлы көшесінің бойында таңғы 6-дан кептеліс басталды. 7-ге қарай кептеліс Мөңке би көшесінен Рысқұлов көшесіне дейін жетті.
Сондай-ақ жол бойында полиция қызметкерлері көлік қозғалысын бақылады, ал жаңа мешіт маңында жедел жәрдем және өрт сөндіру көліктері қойылды. Ал намаз уақытында мешіт іші лық толды.
Айт намазынан шыққан жұрт біраз уақыт тарқаспай, бір-бірін құттықтап, қол алысып, төс қағыстырды.
Еске салайық, бұған дейін Өзбекстан басшысы Ораза айт қарсаңында 488 адамға рақымшылық жасағанын жазғанбыз.
