Алматыда соттың шешімімен заңсыз коммерциялық нысан бұзылды
АЛМАТЫ. KAZINFORM – Алматыда соттың шешімімен Шұғыла шағын ауданындағы Жуалы көшесі, 88 учаскедегі заңсыз салынған асхана мен дүкен бұзылды.
Қала құрылысын бақылау басқармасының мәліметінше, жоспардан тыс тексеру нәтижесінде меншік иесінің рұқсат құжаттары болмаса да ғимарат салған.
«2023 жылы 28 наурызда басқарма меншік иесіне қатысты ӘҚБтК-нің 316-бабы 1, 321-бөлігі бойынша шаралар қабылдады және бұзушылықтарды жоюға нұсқама берді. Меншік иесі нұсқаманы орындамағандықтан, Басқарма Алматы қаласының Наурызбай аудандық сотына аталған нысанды бұзу бойынша талап-арыз берді. Сол жылдың қарашасында Алматы қаласы Наурызбай аудандық сотының шешімімен талап-арыз қанағаттандырылды. Сондай-ақ осы жылдың 7 ақпанында Алматы қалалық соты шешімді өзгеріссіз қалдырды», - деп хабарлады басқармадан.
Меншік иесі Алматы қаласы Әділет департаментінің сот орындаушыларымен бірге нысанды ерікті түрде бұзды. Былтырдан бері 32 заңсыз нысан толық және жартылай бұзылды.
