Алматыда тағы бір көше 10 күнге жабылады

АЛМАТЫ. KAZINFORM – 20 қыркүйек күні сағат 06:00 бастап 30 қыркүйектің сағат 06:00 дейін Алматы қаласының Бостандық ауданында автокөліктердің қозғалысы Журавлев көшесінің бойымен Серкебаев даңғылынан бастап Сеченов көшесіне дейін шектеледі. 

Қозғалыс екі жаққа қарай жабылады. Уақытша шектеулер 1980 жылдан бері пайдаланылып келе жатқан 673 метр құбыржолды жаңғырту учаскесінде жоспарлы жұмыстардың қауіпсіздігін қамтамасыз ету үшін енгізіледі. 

– Уақытша қолайсыздықтар үшін кешірім өтінеміз және оларға түсіністікпен қарауды сұраймыз, - деп хабарлады «Алматы жылу жүйесі» ЖШС. 

Еске салайық, Алматы қаласындағы Абай даңғылының бір бөлігі 10 күнге жабылған болатын. 

Сондай-ақ Алматының кейбір көшелері қазан айының басына дейін жабылды.