Алматыда тағы бір заңсыз салынған нысан бұзылды

АЛМАТЫ. KAZINFORM — Бұл жолы Абылай хан даңғылы, 64 мекенжайында орналасқан тұрғын емес ғимаратқа қосымша салынған құрылыс заң талаптарына сай емес деп танылған. 

Қала құрылысын бақылау басқармасының хабарлауынша, жоспардан тыс тексеріс барысында нысанның рұқсатсыз салынғаны анықталған. 

— Нысан иесіне қатысты әкімшілік шаралар қолданылып, іс материалдары сотқа жолданды. 2025 жылғы 3 маусымдағы сот шешімімен меншік иесіне айыппұл салынып, заңсыз салынған құрылымды мәжбүрлі түрде бұзу міндеттелді, - делінген басқарма хабарламасында.

Сот шешімін орындау мақсатында нысанды меншік иесінің өзі бұзған.

Еске салайық, Алматыда 2 қазанда Мақатаев көшесі, 4а мекенжайында орналасқан Taiyaki coffee дәмханасы бұзылған еді.