Алматыда тауда адасып кеткен туристер құтқарылды

АЛМАТЫ. KAZINFORM — Алматы тауларында құтқарушылар Башут шыңында адасып кеткен туристерді эвакуациялады. Бұл туралы ТЖМ баспасөз қызметі хабарлады.

Алматы тауларында құтқарушылар Башут шыңынан түсу кезінде адасып кеткен туристер тобын іздестіру операциясын жүргізді.

— Төрт адам бағдарын жоғалтып, соқпаққа өз бетінше шыға алмаған. Барлық қатысушылардың қара киім кигендігі жағдайды қиындатып жіберді, сондықтан оларды қараңғы кезде байқау қиын болды, — делінген ақпаратта.

Көмекке ТЖМ Құтқару қызметінің кезекші тобы шықты. «Шымбұлақ» тау шаңғысы курортына жеткен құтқарушылар жол бойымен «Шымбұлақ» өзеніне қарай бет алып туристерді тапты.

Құтқарушылар топты төмен шығарып салып, «Шымбұлақ» тұрағына жеткізді. Олар медициналық көмекке мұқтаж болған жоқ.

Бұған дейін Қарқаралы тауларында адасып кеткен туристер құтқарылған болатын.