Алматыда тіркелген мопедтердің саны 2 мыңнан асты

АЛМАТЫ. KAZINFORM - Алматыда бүгінгі күні 2 мың 13 мопед иесі ресми тіркелген.

Мегаполисте 11 қаңтардан бастап пилоттық жоба аясында мопедтерді тіркеуге рұқсат беретін ережелер күшіне енді.

— Осы жылдың 5 сәуірінен кейін мопедін уәкілетті органда тіркемеген және «А1» санатындағы жүргізуші куәлігінсіз мопедті басқарған жүргізушілер әкімшілік жауапкершілікке тартылатын болады. Ал көлік құралы мамандандырылған айыппұл тұрағына орналастырылады, — деді Әкімшілік полиция басқармасының өкілі Айдын Меркімбаев.

Еске салайық, Қазақстан Республикасының «Жол қозғалысы туралы» заңына енгізілген өзгерістерге сәйкес, мопедтер механикалық көлік құралдарына теңестірілді.

Сондықтан мопедтерді тіркеуден өткізу үшін меншік иесі тұрғылықты жері бойынша Арнайы Халыққа қызмет көрсету орталықтарында рәсімдеу керек.

Ол үшін келесі құжаттар қажет:

* Жеке куәлік (электронды форматта ұсынуға болады);
* Тіркеу туралы өтінішті толтыру;
* Мопедтің техникалық құжаттары немесе оның техникалық сипаттамалары туралы мәліметтер;
* Мопедті техникалық тексеруден өткізу;
* Мемлекеттік алымдарды төлеу:
* Тіркеу үшін — 983 теңге (0,25 АЕК); * Тіркеу куәлігін беру үшін — 4 915 теңге (1,25 АЕК); * Мемлекеттік нөмірді беру үшін — 5 505 теңге (1,4 АЕК).

20 қаңтар күні Алматыда алғашқы мопед тіркеліп, нөмір алғанын жазғанбыз.

Өткен айда Алматыда мыңнан астам мопед тіркелгенін жазғанбыз.