Алматыдағы сауда орталықтардың бірінде мектеп оқушылары төбелесті

АЛМАТЫ. KAZINFORM — Алматыда сауда орталықтарының біріндегі қоғамдық тамақтану орнында мектеп оқушылары төбелесіп қалды.

Оның видеосы әлеуметтік желіде тарады. Алматы қаласының бала құқықтары жөніндегі уәкілі Диана Ерлан қазір қылмыстық іс бойынша тергеу жүргізіліп жатқанын мәлімдеді.

– Мен прокуратураға кәмелетке толмағандарды арнайы оқу мекемесіне орналастырудың заңдылығын қарастыру бойынша сұраныс жібердім. Бүгін прокуратура балаларды арнайы мектепке орналастыру туралы шешімді жойды, – деп атап өтті Диана Ерлан.

Полиция департаментінің мәліметінше, төбелеске қатысушылардың барлығы анықталды. Олардың әрқайсысының әрекетіне тергеу тарапынан құқықтық баға беріліп, заң аясында шара қолданылатын болады.

– Төбелескен жасөспірімдердің ата-аналары балаларын тәрбиелеуде өз міндеттерін орындамағаны үшін жауапкершілікке тартылды. Балалар оқитын жалпы білім беру ұйымдарының әкімшілігіне қылмыс жасауға ықпал еткен себептер мен жағдайларды жою туралы ұсыныстар жіберілді. Оқиғаға қатысушылардың барлығы мектептің ішкі реестріне тіркелді, – деп хабарлады ведомстводан.

Сондай-ақ материалдар Алатау ауданы әкімдігі жанындағы кәмелетке толмағандар істері жөніндегі ведомствоаралық комиссияда қаралатын болады.

Еске салайық, бұған дейін Семей қаласында алтыншы сынып оқушысын соққыға жыққан жасөспірімдерге қатысты қылмыстық іс қозғалғаны туралы жазған едік. 

Кейін соққыға жыққан 3 жеткіншектің әке-шешесі ата-аналық құқығынан айырылды.