Алматының Медеу ауданында 10 балабақша ашылады

АЛМАТЫ. KAZINFORM – Биыл Медеу ауданында бір мектеп пен 10 балабақша пайдалануға беріледі.

Атап айтқанда, «Жайлы мектеп» ұлттық жобасы аясында қаланың оңтүстік бөлігінде, Құлжа тасжолының жанында 2 000 орындық жаңа мектептің құрылысы басталды.

Құрылысты аяқтау 2025 жылдың тамыз айына жоспарланған. Осы кезеңде №161 және №33 мектептерінде күрделі жөндеу және сейсмикалық күшейту жұмыстары да аяқталады.

Сонымен қатар, қолданыстағы білім беру мекемелерін кеңейту мақсатында үш мектепке қосымша ғимараттар салынып жатыр.

Биыл мамырда №131 мектепке 300 орындық қосымша ғимараттың құрылысы басталып, келесі жылдың шілдесінде аяқталады. Ал қыркүйекте «Думан» шағынауданында 1 200 орындық жеке мектептің құрылысы басталып, оны 2026 жылдың тамызында аяқтау жоспарда.

– Мектепке дейінгі мекемелер желісін кеңейту бойынша да белсенді жұмыстар жүргізілуде. Былтыр Алматыда 720 орындық 14 жеке балабақша ашылды, ал 2025 жылдың соңына дейін тағы 500 орынға арналған 10 балабақшаны қолданысқа беру жоспарда. Осы жылы «Думан-2» шағынауданында 320 орындық жеке балабақшаның құрылысы басталып, 2026 жылдың ақпанында ашылады.Көктемде №195 балабақшаның күрделі жөндеуі мен сейсмикалық күшейту жұмыстары аяқталады,– деді Ерболат Досаев Медеу ауданы тұрғындарымен кездесуінде.

Әлеуметтік жауапкершілік аясында «BI Group» құрылыс компаниясы 2025 жылдың тамыз айында жетім балаларға арналған жаңа «Жанұя» мамандандырылған кешенінің құрылысын аяқтайды.

Жоба аясында ескі ғимарат сүріліп, жаңасы салынады. Жобаның жалпы құны – 5,9 млрд теңге.

Еске салайық, Алматыда осы жылы 120-дан астам әлеуметтік нысанды қайта жаңарту және салу жоспарда.