Алматының орталығында кафеге қосымша салынған нысан бұзылды
АЛМАТЫ. KAZINFORM – Алматының орталығында орналасқан кафенің кіреберісі бұзылып жатыр.
Қала құрылысын бақылау басқармасынан мәлім еткендей, Сәтбаев көшесі, 4а мекенжайындағы Juz кафесінің жанындағы құрылыс рұқсат құжаттарынсыз салынған.
Сонымен қатар, ол ерекше қажеттіліктері бар адамдарға арналған пандусты қосып алып, жалпы аумақта орналасқан.
– Былтыр қазан айында жоспардан тыс тексеру барысында «ALMA Construction and Design» ЖШС жалға алушысына қатысты тұрғынның өтініші негізінде басқарма әкімшілік құқық бұзушылық жөніндегі мамандандырылған ауданаралық сотқа материалдарды жіберді, әрі әкімшілік шаралар қабылдады. 2024 жылдың 22 қарашасында сот заңсыз тұрғызылған құрылыстарды бұзу туралы қаулы шығарды және бір айдан кейін, 27 желтоқсанда Алматы қалалық сотының қаулысымен бірінші сатыдағы шешім өзгеріссіз қалды, – деп хабарлады басқармадан.
Нысанды бұзу Әділет департаментінің сот орындаушыларының қатысуымен басталды.
Осыған дейін Алматыда мемлекеттік қордың жерінде заңсыз орнатылған стационарлық емес сауда нысандарын бөлшектеу жұмыстары жүріп жатқаны туралы жазған едік.
Алматыда соңғы екі жылда 65 заңсыз нысан, оның ішінде тұрғын үй кешендері толығымен немесе ішінара бұзылды.
