Алматыда қымбат көлік ұрлап жүргендер ұсталды

АЛМАТЫ. ҚазАқпарат - Алматы полициясы Әуезов ауданындағы бірнеше көлік ұрлығына қатыстыларды қолға түсірді, деп хабарлайды ҚазАқпарат.

Полиция қызметкерлері оларды қолға түсіру үшін бейнетүсірімдерді пайдаланған.

«Ұйымдасқан қылмыстық топ бірнеше «Тойата» камри көліктерін ұрлаған. Алғашқы күндері-ақ біз олардың Қырғыз еліне өтіп жүрген жолын тауып, ізіне түстік. Ары қарай, толық мәліметтер жинау үшін оларға аңду салдық. Нәтижесінде олар кезекті «Тойота Ланд Крузер» көлігін барымталап бара жатқанында ұстадық», - деді Алматы қаласы ІІД Криминалдық полиция басқармасының басшысы полиция подполковнигі Жанболат Зиадин.

Оның айтуынша, қылмыстың топ бес адамнан тұрады. Олардың жасы 23-32 аралығында. Екеуі Жамбыл облысының, екеуі Алматы облысының, біреуі ОҚО тұрғыны.

«Күдіктілер қамауға алынды. Іске қатысты ҚР ҚК-нің 200-бабы бойынша қылмыстыық іс қозғалды», басқарма басшысы Ж.Зиадин.