Анкара әкімі Ыстамбұлдағы митингте Имамоғлуға қолдау көрсетті
АСТАНА. KAZINFORM — Оппозициялық көзқарасымен танымал Анкара әкімі Мансур Яваш Ыстамбұлдағы митингілерге наразылық білдірушілерге қолдау көрсету мақсатында қосылды, деп хабарлайды Kazinform агенттігінің меншікті тілшісі.
Имамоғлу қамауға алынғаннан кейін бірден басталған наразылықтар Түркияның басқа қалаларына да жылдам тарады. Алғашқы күндерден бастап оппозициялық «Республикалық халықтық партия» (РХП) төрағасы Өзгүр Өзел шерулерге белсенді қатысып келеді. Сонымен қатар, Анкара әкімі Яваш та РХП идеяларын қолдайтынын растады.
Өзінің бүкіл саяси мансабында реформалар мен адам құқықтарын қорғаудың жақтаушысы ретінде танылған Яваш наразылықтарға қатысу қазіргі Түркиядағы саяси жағдайда маңызды белгі екенін мәлімдеді. Ол демократиялық құндылықтарды, азаматтардың өз пікірін білдіру және бейбіт наразылықтарға қатысу құқығын қолдайтынын ерекше атап өтті.
Билік тарапынан 23 наурызға дейін енгізілген шектеулерге қарамастан, Ыстамбұлдағы шерулер мен акциялар жалғасуда. 20-нан 21-наурызға қараған түні Түркияның бірнеше қаласында қайтадан наразылықтар өтті. Ыстамбұлда қала әкімдігінің ғимараты маңына көптеген адамдар жиналды.
Анкара әкімі әлеуметтік желіде өзінің Ыстамбұлдағы тарихи Сарачхане ауданында, наразылық акциялары өтіп жатқан қала әкімдігі алдында тұрғанын хабарлады. Бұл шерулер қамауға алынған Ыстамбұл мэрі Экрем Имамоғлуға қолдау көрсету мақсатында ұйымдастырылған.
Бұған дейін әріптесін қолдайтынын білдірген Мансур Яваш Ыстамбұлға бара жатқанын, сондай-ақ РХП-ның парламенттік тобы мен демократия үшін күресіп жатқан барлық мэрлер мен партия мүшелерін қолдайтынын мәлімдеген болатын.
Өзінің жазбасында ол қамауға алынған Имамоғлуды «біздің президентіміз» деп атап, осылайша оппозиция көшбасшысына адалдығы мен қолдауын айқын көрсетті.
Ыстамбұл мэрі Экрем Имамоғлу 19 наурыз күні жемқорлық және парақорлықпен айналысқан қылмыстық топты ұйымдастырды деген айыппен қамауға алынды. Мемлекеттік айыптау тарапы оның және серіктестерінің жоғары деңгейдегі сыбайлас жемқорлық схемаларына қатысы болуы мүмкін екенін алға тартады. Төрт күнге созылатын тергеу барысында қала басшысы мен оның жақтастары қамауда болады.
Бұған дейін Түркия президенті Режеп Тайып Ердоған оппозицияны сынап, оларды құқық қорғау органдары мен сот жүйесіне саяси қысым көрсетуге тырысты деп айыптаған болатын.
Ердоғанның айтуынша, оппозицияның ішкі жанжалдары мен заңға қатысты мәселелерін Түркиядағы ең басты проблема ретінде көрсету әрекеттері – екіжүзділіктің шарықтау шегі.
